Azeem Murtaza
ye aur baat hai ki madava-e-gham na tha
lekin tira ḳhulus tavaqqo se kam na tha
kya kya faraghaten thiin mayassar hayat ko
vo din bhi the ki tere siva koi gham na tha
kuchh ham girift-e-gardish-e-dauran men aa ga.e
kuchh dil bhi tere ishq men sabit-qadam na tha
aa.e hain yaad tujh se bichhaḌ kar vo log bhi
jin se ta.alluqat bigaḌne ka gham na tha
vo daur-e-ishq mahz bhi kiya vaqt tha ‘azim’
jab dil pe naqsh mohr-o-nishan-e-sitam na tha
Leave a Reply