mile ghairon se mujh ko ranj o gham yuun bhi hai aur yuun bhi
vafa-dushman jafa-ju ka sitam yuun bhi hai aur yuun bhi
kahin vamiq kahin majnun raqam yuun bhi hai aur yuun bhi
hamare naam par chalta qalam yuun bhi hai aur yuun bhi
shab-e-vada vo aa jaa.en na aa.en mujh ko bulva len
inayat yuun bhi hai aur yuun bhi karam yuun bhi hai aur yuun bhi
udu likkhe mujhe naama tumhari mohr us ka ḳhat
jafa yuun bhi hai aur yuun bhi sitam yuun bhi hai aur yuun bhi
na ḳhud aa.en na bulva.en shikayat kyuun na likh bhejun
inayat ki nazar mujh par karam yuun bhi hai aur yuun bhi
ye masjid hai ye mai-ḳhana ta.ajjub is par aata hai
janab-e-shaiḳh ka naqsh-e-qadam yuun bhi hai aur yuun bhi
tujhe navvab bhi kahte hain sha.ir bhi samajhte hain
zamane men tira ‘sa.el’ bharam yuun bhi hai aur yuun bhi
Leave a Reply