ai dila ham hue paband-e-gham-e-yar ki tu
ab aziyyat men bhala ham hain giraftar ki tu
ham to kahte the na ashiq ho ab itna to bata
ja ke ham rote hain pahron pas-e-divar ki tu
haath kyuun ishq-e-butan se na uthaya tu ne
kaf-e-afsos ham ab malte hain har baar ki tu
vahi mahfil hai vahi log vahi hai charcha
ab bhula baithe hain ham shakl-e-gunahgar ki tu
ham to kahte the ki lab se na laga saghar-e-ishq
mai-e-andoh se ab ham hue sarshar ki tu
be-jagah ji ka phansana tujhe kya tha darkar
taan o tashnia ke ab ham hain saza-var ki tu
vahshat-e-ishq buri hoti hai dekha nadan
ham chale dasht ko ab chhod ke ghar-bar ki tu
atish-e-ishq ko siine men abas bhadkaya
ab bhala khinchun huun main ah-e-sharar-bar ki tu
ham to kahte the na hamrah kisi ke lag chal
ab bhala ham hue rusva sar-e-bazar ki tu
ghaur kiije to ye mushkil hai zamin ai ‘jurat’
dekhen ham is men kahen aur bhi ashar ki tu
Leave a Reply