Poet
zaban pe aane se pahle kahi ga.i huun main
kisi ḳhayal men kho kar buni ga.i huun main
mire ḳhayal ki dahliz itni unchi hai
ki asman ke barabar chuni ga.i huun main
mira ghurur miri vahshaton pe haavi hai
kuchh aise vasf se mumtaz ki ga.i huun main
mire vajud men pahron sukut rahta hai
na jaane kis ki sada men gundhi ga.i huun main
mire ḳhayal se jal jaate hain charagh-e-sahar
ki taq-e-shams-o-qamar par rakhi ga.i huun main
vo roz ḳhvab ke rauzan se dekhta hai mujhe
ajiib Dor hai jis se bandhi ga.i huun main
sabhi ke dil men ‘diya’ pyaar ka jalati huun
varaq varaq pe ujala likhi ga.i huun main
Leave a Reply