Yun to Kya Kya Log Chhupe the Darwazon Ke Pichhe

yuuñ to kyā kyā log chhupe the darvāzoñ ke pīchhe

maiñ hī bas uḌtā rahtā thā āvāzoñ ke pīchhe

ḳhuun kā ik qatra varna phir maut kā nashsha hogā

par aisī shai kab hotī hai parvāzoñ ke pīchhe

vo to log banā dete haiñ pur-asrār fazā ko

aksar koī raaz nahīñ hotā rāzoñ ke pīchhe

mausīqār ke bas meñ kab hai lai ko lau meñ Dhāle

ek an-dekhā haat bhī hotā hai sāzoñ ke pīchhe

phir to apne ḳhuun meñ tair ke paar utarnā hogā

talvāroñ kī fasl ho jab tīr-andāzoñ ke pīchhe

tamġha pension beva bachche māyūsī tanhā.ī

ek kahānī rah jaatī hai jāñ-bāzoñ ke pīchhe

ab to har chaukhaT par māthā Tek rahe ho ‘saifī’

aur agar dīvāreñ nikleñ darvāzoñ ke pīchhe

Leave a Comment