Poet
yuun paband-e-salasil ho kar kaun phire bazaron men
ḳhud hi qaid na ho jaa.en kyuun apni hi divaron men
raat ke lamhon ki sangini dil ko Dasti rahti hai
jism sulagta rahta hai tanha.i ke angaron men
raushniyon ke shahr andheron ke jaadu men Duub ga.e
bujhne lagi ho nuur ki mash.al jaise chand-sitaron men
dard ke tapte sahra men ik abla-pa sar-gardan hai
tum ko kya tum jashn manao ḳhushiyon ke gahvaron men
main koi suqrat na tha jo zahr ka pyala pi jaata
main ḳhud kaise Duub sakunga apne lahu ki dharon men
shahr ki rahen raqs-kunan hain rang faza men bikhra hai
kitne chehre saje hue hain in chamkili caron men
Leave a Reply