Yaqoob Parwaz
main tira hi aa.ina huun aur bas
tujh ko dekha chahta huun aur bas
kyuun samajhte ho mujhe manzil-numa
TeḌha-meḌha rasta huun aur bas
hai abhi mahdud meri agahi
main to itna janta huun aur bas
koi to khole miri pechidgi
main kisi ka za.icha huun aur bas
ab kisi tarmim ka mat sochna
main mukammal faisla huun aur bas
DhunDhna mujh ko koi mushkil nahin
bhiiḌ men khoya hua huun aur bas
kis jagah aur kab barasna hai mujhe
main to ik umDi ghaTa huun aur bas
laakh huun parvaz pur-asrar main
ḳhud hi apna tarjuma huun aur bas
Leave a Reply