Sagheer Malal
na jaane kyuun sada hota hai ek sa anjam
ham ek si to kahani sada nahin kahte
jidhar pahunchna hai aghaz bhi vahin se hua
safar samajhte hain is ko saza nahin kahte
naya shu.ur na.e isti.are laata hai
azal se log ḳhuda ko ḳhuda nahin kahte
jo giit chunte hain ḳhamoshiyon ke sahra se
vo lab-kushaon ko raz-ashna nahin kahte
faza ka lafz hai us ke liye alag maujud
jo ghar Thaharti hai us ko hava nahin kahte
zamane bhar se ulajhte hain jis ki janib se
akele-pan men use ham bhi kya nahin kahte
jo dekh lete hain chizon ke ar-par ‘malal’
kisi bhi chiiz ko itna bura nahin kahte
Leave a Reply