harim-e-zat ke parde men justuju yaran
zahe-nasib mujhe meri aarzu yaran
havas ko ishq bata kar tahi-kadu yaran
mai-e-ayagh se chhalka ga.e lahu yaran
shabab hai mire saaqi ka aftab ki lau
badan hai saaz men dipak ki ik numu yaran
isi gunah ne mala.ek pe fauqiyat baḳhshi
yahi gunah bashariyyat ki aabru yaran
kabhi ḳhizan men kabhi ḳhar-o-ḳhas ke parde men
chaman men bikhre hain har-samt rang-o-bu yaran
jise main ḳhud se bhi kahne ki taab la na saka
vo ek baat kahi un ke ru-ba-ru yaran
vahi to jam-e-shifa hai bala-kashon ke liye
vo ik nigah jo phirti hai char-su yaran
usi ḳhalish ne use ḳhud-kushi pe uksaya
ki ek shaḳhs se milta hai hu-ba-hu yaran
zamana badla hai rang-e-chaman bhi badlega
chinar ab nazar aate hain sho.ala-ru yaran
Leave a Reply