Rana Abdurrab
le kar hijr ki pahli talḳhi chalta hai
dekhte hain ki kab tak farvari chalta hai
main kahta huun tuf hai aise jiine par
saans ka pahiya tere bin bhi chalta hai
achchha tera rasta dekhna hai main ne
achchha banda le kar naukri chalta hai
us ke qurb men rah kar jaana jhuuT hai ye
khoTa sikka ik din lazmi chalta hai
tere aane par to barish aati hai
saara shahr hi le kar chhatri chalta hai
jiine ko bhi jiina kahna Thiik nahin
saans ka chalna bhi to farzi chalta hai
chaar dinon men thak kar vapas jaata hai
chaar dinon men kitna aadmi chalta hai
paida hone vaala maut ke daftar se
le kar apni qabr ki taḳhti chalta hai
vaqt ki ziin pe baiThna ‘abdul’ na-mumkin
ham kahil hain aur ye jaldi chalta hai
Leave a Reply