yuun ilaj-e-dil bimar kiya jaega
sharbat-e-did se sarshar kiya jaega
hasrat-e-did men binai ganva baithe jo
is se kaise tira didar kiya jaega
so raha huun main zamane se tira khvab liye
niind se kab mujhe bedar kiya jaega
tuut jaega bharam pariyon ki shahzadi ka
jab tire husn ko shahkar kiya jaega
khud-kushi ki khabar akhbar ki surkhi hogi
qatl mujh ko pas-e-divar kiya jaega
main sadaqat huun mujhe maut nahin aaegi
vaise maslub kai baar kiya jaega
in charaghon ke tabassum men lahu hai mera
kab havaon ko khabar-dar kiya jaega
dil ke jazbat javan aur bhi ho jaenge
meri rahon ko jo dushvar kiya jaega
honge sharminda manadir ke kalas bhi ‘afzal’
kisi masjid ko jo mismar kiya jaega
Leave a Reply