Anwar Shadani
yuun hi kab tak miri taqdir men bal a.enge
aaj ki baat pe kahte ho ki kal a.enge
paanv jab jazb-e-mohabbat ke nikal a.enge
vadi-e-husn-o-javani men ḳhalal a.enge
chal tu le kar hamen ai masti-e-zauq-e-sajda
munh pe ḳhak-e-dar-e-mahbub hi mal a.enge
hausla shart hai halat se mayus na ho
raste ḳhud hi chaTanon se nikal a.enge
karvaTen leta hai jab dard-e-mohabbat dil men
koi chupke se ye kahta hai sambhal a.enge
jab bahar aa.egi phulon pe shabab aa.ega
tazkire meri tabahi ke nikal a.enge
ab na aa.ega koi sani-e-‘shadan’ ‘anvar’
go bahut ahl-e-suḳhan ahal-e-ghazal a.enge
Leave a Reply