Zia Fatehabadi
yuun hasraton ki gard men tha dil aTa hua
jaise daraḳht se koi patta gira hua
ho hi gaya hai nabz-shanas-e-gham-e-jahan
siine men ishq ke mira dil kanpta hua
milta suragh-e-ḳhak mujhe mere saa.e ka
har samt zulmaton ka tha jangal uga hua
kal raat ḳhvab men jo muqabil tha aa.ina
mera hi qad mujhe nazar aaya baḌha hua
jaane bhi do vo chand nahin hoga koi aur
pamal aadmi jo hua chand kya hua
bahar ke shor-o-ghul hi se shayad vo bol uThe
baiTha hai kab se chup koi andar chhupa hua
panchhi uḌa to ḳhatm bhi ho ja.ega ‘ziya’
sanson ke ane-jane ka tanta bandha hua
Leave a Reply