Shahid Jamal
kaise toḌi ga.i ye hadd-e-adab puchhte hain
phuul shaḳhon se lachakne ka sabab puchhte hain
shaḳh jis shaḳh se Takra.i hai jhuum uTThi hai
peḌ aapas men kahan nam-o-nasab puchhte hain
koi andaza kare chand ki bechaini ka
jab sitare kabhi suraj ka laqab puchhte hain
aankh jaise hi jhapakti hai hamesha kuchh ḳhvab
kitne din ba.ad mayassar hui shab puchhte hain
gungunate hue ma.asum se jharne ‘shahid’
kyuun hai dariyaon men hi qahr-o-ghazab puchhte hain
Leave a Reply