Shamsa Najm
yuun hain ḳhayal-e-yar pe iqan kiye hue
kuchh qurbaton ki yaad ko mehman kiye hue
lagte hain mere dost ba-zahir to pur-ḳhulus
par bughz dil men rakhte hain pinhan kiye hue
phailegi is jigar ke lahu se hi raushni
baiThi huun rahguzar men charaghan kiye hue
lafzon ke abshar men bahne lage hain gham
do bol pyaar ke mujhe farhan kiye hue
aa ja.iye ki dard bhi kuchh intiha ka hai
muddat hui hai dard ka darman kiye hue
baiThe hain aas men hai shafa.at ka aasra
kuchh aḳhirat ka ham nahin saman kiye hue
Leave a Reply