Yun Bhatakna dar-Ba-dar Achchha Nahin Lagta Mujhe

yuun bhaTakna dar-ba-dar achchha nahin lagta mujhe

bin tumhare ye safar achchha nahin lagta mujhe

pyaar ke is khel men anjam sab ka ek hai

TuTna dil ka magar achchha nahin lagta mujhe

aasra allah ka kaafi hai insan ke liye

haath phaila kar bashar achchha nahin lagta mujhe

main bura huun ye bhala apni ana men mast huun

kyuun udhar ja.un jidhar achchha nahin lagta mujhe

aane vaali nasl ke haq men duaen kijiye

phuul se chehron pe dar achchha nahin lagta mujhe

hoti hai bachchon se raunaq har dar-o-divar ki

bin parindon ke shajar achchha nahin lagta mujhe

jin gharon men ho nahin shamil dua man-bap ki

koi bhi ghar ho vo ghar achchha nahin lagta mujhe

Leave a Comment