Adeel Zaidi
bas lamhe bhar men faisla karna pada mujhe
sab chhod-chhad ghar se nikalna pada mujhe
jab apni sar-zamin ne mujh ko na di panah
anjan vadiyon men utarna pada mujhe
paanv men aable the thakan umr bhar ki thi
rukna tha baithna tha pa chalna pada mujhe
apni parakh ke vaste tufan ke darmiyan
mazbut kashtiyon se utarna pada mujhe
teri ana ke haath men the tere faisle
tu to badal na paaya badalna pada mujhe
be-intiha tazad tha donon ki soch men
kuchh yuun bhi raste ko badalna pada mujhe
ye bhi hua ki ba-dil-e-na-khvasta kabhi
zinda haqiqaton se mukarna pada mujhe
yakja raha ik umr magar teri diid ko
manind-e-musht-e-khak bikharna pada mujhe
aghaz apne bas men na anjam hi ‘adil’
ik zindagi guzar ke marna pada mujhe
Leave a Reply