abu-mohammad-sahar

Phulon Ki Talab Mein Thoda Sa Aazar Nahin To Kuchh Bhi Nahin

phulon ki talab men thoda sa azar nahin to kuchh bhi nahin

khud aa ke jo uljhe daman se vo khaar nahin to kuchh bhi nahin

ho din ki fazaon ka sargam ya bhigti raton ka aalam

kitna hi suhana ho mausam dildar nahin to kuchh bhi nahin

kyuun ahl-e-sitam ka dil toden phir shahr men chal kar sar phoden

sahra-e-junun ko ab chhoden divar nahin to kuchh bhi nahin

har mauj-e-bala ik sahil hai girdab hi apna hasil hai

ye kashti-e-dil vo qatil hai manjhdar nahin to kuchh bhi nahin

kya mithe bol sunate ho kya giit anokhe gaate ho

kya naghmon par itrate ho jhankar nahin to kuchh bhi nahin

ye naam o numud ki khvahish kya ye ilm o fan ki numaish kya

apna to aqida hai ye ‘sahar’ meyar nahin to kuchh bhi nahin

More Poems

Leave a Comment