sahn-e-maqtal men har ik zaḳhm-e-tamanna rakh do
aur qatil ka naya naam masiha rakh do
ab to rusva.i ki had men hai meri tishna-labi
ab to honThon pe dahakta hua sho.ala rakh do
kitni tarik hai shab mere makan ki yaron
in munDeron pe koi chand sa chehra rakh do
ab ki barish men mira naam chamak ja.ega
laakh tum ret ki tah men mira katba rakh do
phir bhi haq baat ke kahne se na ba.az a.unga
mere hathon pe bhale daulat-e-duniya rakh do
niind si aane lagi zulf ke saa.e men mujhe
phir mire ḳhvabon pe tapta hua sahra rakh do
mere afsane ko phir moḌ naya sa de do
aur unvan sulagta hua lamha rakh do
jo samajhte hi nahin meri zaban ko ‘ishrat’
un ke afkar men mera lab-o-lahja rakh do
Leave a Reply