Zia Zameer
ye to hathon ki lakiron men tha girdab koi
itne se paani men agar ho gaya gharqab koi
gham ziyada hain bahut ankhen hain sahra sahra
ab to aa jaa.e yahan ashkon ka sailab koi
ishq ka faiz hai ye tu jo chahak uTTha hai
be-sabab itna bhi hota nahin shadab koi
abr ban kar mujhe aghosh men le aur samajh
kaise sahra ko kya karta hai sairab koi
tarbiyat diid ki dete hain jo hain la.iq-e-did
ḳhud kahan janta hai diid ke adab koi
ye jo har dhuup ko lalkarti rahti hai sada
kya mire sar pe duaon ki hai mehrab koi
kaisi tabir ki hasrat ki ‘ziya’ barson se
na-murad ankhon ne dekha hi nahin ḳhvab koi
Leave a Reply