Ahmad Hamdani
ye teri chaah bhi kya teri aarzu bhi kya
hamare jism men ye daudta lahu bhi kya
hai jis ke dhyan men har lamha khvab ka aalam
mile kahin to karen us se guftugu bhi kya
tire khayal ki khushbu tire jamal ka rang
hamare dasht men lekin ye rang-o-bu bhi kya
ye tapti ret ye pyasi zamin yahan logo
kisi ke pyaar se mahki hui numu bhi kya
hazar koh-o-bayaban kiye hain tai lekin
hue ham abla-payan lahu lahu bhi kya
kisi ki yaad men kat jaae zindagi saari
ik aarzu to hai lekin ye aarzu bhi kya
Leave a Reply