kabhi ḳhushi kabhi gham ke payam aate hain
kisi ke ishq men kya kya maqam aate hain
hamare piine ka andaz bhi nirala hai
hamare vaste ankhon se jaam aate hain
jise bhula.e hue ek umr biit ga.i
usi ke aaj bhi mujh ko salam aate hain
kisi ki yaad ke lamhe hamare dil ki taraf
ibadaton ke liye sub.h-o-sham aate hain
andhera chhaya to saa.e ne saath chhoḌ diya
suna hai vaqt pe apne hi kaam aate hain
jo rang ubharte hain ulfat ki dastan men ‘nazar’
faqat unhin ke misalon men naam aate hain
Leave a Reply