inhi galiyon men ik aisi gali hai
jo mere naam se tanha rahi hai
ab is se aur bhi sham.en jala lo
savad-e-jan men ik mash.al jali hai
hamare sar ga.e sang-e-harifan
mai-o-mina se aafat Tal ga.i hai
main bahr-e-azma.ish bhi jala huun
ki dekhun mujh men kitni raushni hai
ilahi ḳhair ho in bastiyon ki
pas-e-divar ik parchha.in si hai
savad-e-shahr men koi bala hai
jo vahshat bin ke pichha kar rahi hai
hui phir shaam phir din bhar ki shorish
gali-kuchon men chhap kar so ga.i hai
kuchh aise so rahe hain shahr vaale
ki ik muddat men niind un ko mili hai
ye ghar sote ke sote hi na rah jaa.en
hava-e-hashr-saman chal rahi hai
hui phir sub.h zaḳhmon ke ufuq se
faza phir taaza dam ho kar uThi hai
kisi qaidi ko phir ḳhvabon se uTh kar
kisi zanjir ne avaz di hai
gharon se chand lamhon ki rifaqat
bichhaḌ kar shahar ki janib chali hai
lahu rista hai dast-e-shisha-gar se
faza a.ina-ḳhana ban ga.i hai
phir apne da.ere qausen bana.e
vahi miTTi vahi kuza-gari hai
tum is se kya bachoge ‘shauq’-sahab
ki qismat men yahi gardish likhi hai
Leave a Reply