main jab vajud ke hairat-kade se mil raha tha
mujhe laga main kisi mo.ajize se mil raha tha
main jagta tha ki jab log so chuke the tamam
charagh mujh se mire tajarbe se mil raha tha
havas se hota hua aa gaya main ishq ki samt
ye silsila bhi usi raste se mil raha tha
ḳhuda se pahli mulaqat ho rahi thi miri
main apne aap ko jab samne se mil raha tha
ajiib lai thi jo tasir de rahi thi mujhe
ajiib lams tha har zaviye se mil raha tha
main us ke sina-e-shaffaf ki hari lau se
dahak raha tha so puure maze se mil raha tha
savab-o-ta.at-o-taqva fazilat-o-alqab
paḌe hue the kahin main nashe se mil raha tha
tire jamal ka bujhna to lazmi tha ki tu
baghair ishq kiye aa.ine se mil raha tha
zamin bhi mire aghosh-e-surḳh men thi ‘ali’
falak bhi mujh se hare za.iqe se mil raha tha
Leave a Reply