na divaren hain aur na dar purana
abhi tak phir bhi hai ye ghar purana
Dara deta jaga deta hai mujh ko
darun-e-zehn baiTha Dar purana
marahil aḳhiri ta.alim ke hain
miri maan ne nikala zar purana
tamasha phir vahi imsal hoga
vahi dastar hogi sar purana
saja matam kanar-e-dasht-e-mizhgan
suna qissa vo chashm-e-tar purana
agar hai dastaras dast-e-saḳhavat
mila de yaar lamha bhar purana
agar aa hi gaya hai vo to ‘tahir’
shikayat kar na shikva kar purana
Leave a Reply