Syed Hamid
aankh jo ishva-e-pur-kar liye phirti hai
muzhda-e-tale-e-bedar liye phirti hai
naam se daad bhi milti hai suḳhan ko aksar
charḳh par shohrat-e-fankar liye phirti hai
ḳhaak se phuul nikalte hain mahakta hai chaman
kya zamin tabla-e-attar liye phirti hai
koi mahfil bhi nahin jo na ho ta.id-talab
dar-ba-dar jur.at-e-inkar liye phirti hai
ban ga.i parda-nashin khinch ke palkon ke hisar
ham ko lekin nigah-e-yar liye phirti hai
phenk kar ḳhaak men aqdar ko tahqir ke saath
zindagi dirham-o-dinar liye phirti hai
Leave a Reply