is raah men aate hain bayaban bhi chaman bhi
kahte hain jise ziist shabistan bhi hai ran bhi
kya ho gaya insan ka vo shauq-e-shahadat
viran nazar aate hain ab dar-o-rasan bhi
bujh ja.egi mil-jul ke agar pyaas bujhao
ganga hi ke nazdik to hai rud-e-jaman bhi
ab lala-ba-daman na koi chak-gareban
viran chaman hi nahin sunsan hai ban bhi
ik ham hi nahin abla-pa dasht-o-daman men
aate hain nazar ḳhak-basar lala-badan bhi
ḳhali nahin ab daman-e-hasrat mira ‘darshan’
ham-rah-e-vafa mujh ko mila ishq-e-vatan bhi
Leave a Reply