Mohsin Bhopali
ye tai hua hai ki qatil ko bhi dua diije
ḳhud apna ḳhuun baha phir bhi ḳhun-baha diije
niyaz-o-naz baja hain magar ye shart-e-visal
hai sang-e-rah-e-ta.alluq ise haTa diije
suna tha ham ne ki manzil qarib aa pahunchi
kahan hain aap agar ho sake sada diije
sahar qarib sahi phir bhi kuchh ba.iid nahin
charagh bujhne lage hain to lau baḌha diije
mahakte zaḳhmon ko in.am-e-fasl-e-gul kahiye
sulag uThe jo chaman barq ko dua diije
kuchh is tarah hai ki guzre hain jis qayamat se
samjhiye ḳhvab use ḳhvab ko bhula diije
badal ga.e hain taqaze suḳhan-shanasi ke
udhar ata ho idhar daad barmala diije
ye kya zarur ki ehsas ko zaban mil jaa.e
hai hukm-e-naghma-sara.i to gunguna diije
Leave a Reply