Anjum Irfani
ye raat Dhalte Dhalte rakh ga.i javab ke liye
ki teri ankhen jagti hain kis ke ḳhvab ke liye
kitab dil pe likhne ki ijazat us ne di na thi
hai saada aaj bhi varaq ye intisab ke liye
miri nazar men aa gaya hai jab se ik sahifa-ruḳh
kashish rahi na dil men ab kisi kitab ke liye
hamari mahzar-e-amal hai zer-e-faisla abhi
khaḌe hain sar jhuka.e kab se ehtisab ke liye
purane paḌ chuke kabhi ke sab tariqa-e-sitam
ḳharabi aur chahiye dil-e-ḳharab ke liye
samajh rahe hain sab yahan hai zindagi azab-e-jan
magar ye bhag-dauḌ hai isi azaab ke liye
tamam jism zaḳhmon se gulab-zar ho gaya
to laḌ rahe hain ‘anjum’ ab ye kis gulab ke liye
Leave a Reply