Poet
duur faza men ek parinda khoya hua uḌanon men
us ko kya malum zamin par chaḌhe hain tiir kamanon men
phuul toḌ ke log le ga.e unche baḌe makanon men
ab ham kanTe saja ke rakkhen miTTi ke gul-danon men
be-dar-o-bam Thikana jis men dhuul dhuup sannaTa gham
vahi hai mujh vahshi ke ghar men jo kuchh hai viranon men
aap ke qadmon ki aahaT se shayad ḳhvab se jaag uThe
soi hui viran udasi kamron men dalanon men
ranj o alam tanha.i ke sathi guzar basar ko kaafi hain
ḳhushi to shamil ho jaati hai aa.e ga.e mehmanon men
arman saje saje palkon par taar taar thi apni jeb
apne liye to zaḳhm-e-dil the bazar aur dukanon men
vaqt ne kaisa ruup diya jo log nahin pahchan sake
kaash ki ḳhud ko dekh bhi sakte jag ke a.ina-ḳhanon men
zikr-e-‘shams’ udaas karega chhoḌo aur koi baat karo
aise shaḳhs ki kyuun tum ginti ginte ho insanon men
Leave a Reply