Basir Sultan Kazmi
ye nahin hai ki tujhe main ne pukara kam hai
mere nalon ko havaon ka sahara kam hai
is qadar hijr men ki najm-shumari ham ne
jaan lete hain kahan koi sitara kam hai
dosti men to koi shak nahin us ki par vo
dost dushman ka ziyada hai hamara kam hai
saaf iz.har ho aur vo bhi kam-az-kam do baar
ham vo aaqil hain jinhen ek ishara kam hai
ek ruḳhsar pe dekha hai vo til ham ne bhi
ho samarqand muqabil ki buḳhara kam hai
itni jaldi na bana raa.e mire baare men
ham ne hamrah abhi vaqt guzara kam hai
baagh ik ham ko mila tha magar us ko afsos
ham ne ji bhar ke bigaḌa hai sanvara kam hai
aaj tak apni samajh men nahin aaya ‘basir’
kaun sa kaam hai vo jis men ḳhasara kam hai
Leave a Reply