khumar-barabankavi

Ye Misra Nahin Hai Wazifa Mera Hai

ye misraa nahin hai vazifa mira hai

khuda hai mohabbat mohabbat khuda hai

kahun kis tarah main ki vo bevafa hai

mujhe us ki majburiyon ka pata hai

hava ko bahut sar-kashi ka nasha hai

magar ye na bhule diya bhi diya hai

main us se juda huun vo mujh se juda hai

mohabbat ke maron pe fazl-e-khuda hai

nazar men hai jalte makanon ka manzar

chamakte hain jugnu to dil kanpta hai

unhen bhulna ya unhen yaad karna

vo bichhde hain jab se yahi mashghala hai

guzarta hai har shakhs chehra chhupae

koi raah men aina rakh gaya hai

badi jaan leva hain maazi ki yaden

bhulane ko ji bhi nahin chahta hai

kahan tu ‘khumar’ aur kahan kufr tauba

tujhe parsaon ne bahka diya hai

More Poems

Leave a Comment