Qafas Ki Tiliyon Se Le Ke Shakh-e-Ashiyan Tak Hai

Bedam Shah Warsi

qafas ki tiliyon se le ke shakh-e-ashiyan tak hai

miri duniya yahan se hai miri duniya vahan tak hai

zamin se asman tak asman se la-makan tak hai

khuda jaane hamare ishq ki duniya kahan tak hai

khuda jaane kahan se jalva-e-janan kahan tak hai

vahin tak dekh sakta hai nazar jis ki jahan tak hai

koi mar kar to dekhe imtihan-gah-e-mohabbat men

ki zer-e-khanjar-e-qatil hayat-e-javedan tak hai

niyaz-o-naz ki rudad-e-husn-o-ishq ka qissa

ye jo kuchh bhi hai sab un ki hamari dastan tak hai

qafas men bhi vahi khvab-e-pareshan dekhta huun main

ki jaise bijliyon ki rau falak se ashiyan tak hai

khayal-e-yar ne to aate hi gum kar diya mujh ko

yahi hai ibtida to intiha us ki kahan tak hai

javani aur phir un ki javani ai maaz-allah

mira dil kya tah-o-bala nizam-e-do-jahan tak hai

ham itna bhi na samjhe aql khoi dil ganva baithe

ki husn-o-ishq ki duniya kahan se hai kahan tak hai

vo sar aur ghair ke dar par jhuke tauba maaz-allah

ki jis sar ki rasai tere sang-e-astan tak hai

ye kis ki laash be-gor-o-kafan pamal hoti hai

zamin jumbish men hai barham nizam-e-asman tak hai

jidhar dekho udhar bikhre hain tinke ashiyane ke

miri barbadiyon ka silsila ya-rab kahan tak hai

na meri sakht-jani phir na un ki tegh ka dam-kham

main us ke imtihan tak huun vo mere imtihan tak hai

zamin se asman tak ek sannate ka aalam hai

nahin maalum mere dil ki virani kahan tak hai

sitamgar tujh se ummid-e-karam hogi jinhen hogi

hamen to dekhna ye tha ki tu zalim kahan tak hai

nahin ahl-e-zamin par munhasir matam shahidon ka

qaba-e-nilgun pahne faza-e-asman tak hai

suna hai sufiyon se ham ne aksar khanqahon men

ki ye rangin-bayani ‘bedam’-e-rangin-bayan tak hai