Pyas Har Zarra-E-Sahra Ki Bujhai Gai Hai

Arshad Jamal Sarim

pyaas har zarra-e-sahra ki bujha.i ga.i hai

tab kahin ja ke miri abla-pa.i ga.i hai

qaid men rakkhi ga.i hai kahin titli koi

koi ḳhushbu kahin bazar men laa.i ga.i hai

kya bhala apni sama.at men ghule koi miThas

vaqt ke honTon se kab talḳh-nava.i ga.i hai

kis ki tanvir se jal uTThe basirat ke charagh

kis ki tasvir ye ankhon se laga.i ga.i hai

ho ga.i ja ke shafaq-rangi-e-afaq men zam

kaf-e-doshiza-e-dil se jo hina.i ga.i hai

uTh ai barbad-e-tamanna ki na.i ḳhvab–kaniz

haram-e-chashm men phir raqs ko laa.i ga.i hai

vaqt aisa bhi to aaya hai junun par ‘sarim’

nok-e-mizhgan se talvar uTha.i ga.i hai