Ye Lafz Lafz Shoala-Bayani Usi Ki Hai

ye lafz lafz sho.ala-bayānī usī kī hai

himmat hai aur kis meñ kahānī usī kī hai

takmīl ho rahī hai bichhaḌne ke bāvajūd

baaqī kī zindagī bhī kahānī usī kī hai

rut aa ga.ī na.ī to use dekh kar lagā

shāyad ye koī yaad purānī usī kī hai

manzar meñ aur kyā hai ye dekhā nahīñ abhī

lekin ye hai jo oḌhnī dhānī usī kī hai

maiñ to bahut dinoñ se ye kahtā thā aaj to

sab ne kahā ye shaam suhānī usī kī hai

ik sañg hai ki jiine kā jis ko milā hai hukm

is dil kī dhaḌkanoñ meñ ravānī usī kī hai

ḳhat ho koī kitāb ho yā dil kā zaḳhm ho

jo bhī hai mere paas nishānī usī kī hai

Leave a Comment