ye kis vahshat-zada lamhe men daḳhil ho ga.e hain
ham apne aap ke madd-e-muqabil ho ga.e hain
ka.i chehre miri sochon se zaa.il ho ga.e hain
ka.i lahje mire lahje men shamil ho ga.e hain
ḳhuda ke naam se tufan men kashti utari
bhanvar jitne samundar men the, sahil ho ga.e hain
vo kuchh pal jin ki ThanDi chhanv men tum ho hamare
vahi kuchh pal to jivan bhar ka hasil ho ga.e hain
ulajhte ja rahe hain justuju ke par musalsal
zamin-ta-asman kitne masa.il ho ga.e hain!
‘nabil’ avaz bhi apni kahan thi muddaton se
jo tum aa.e to ham yak-laḳht mahfil ho ga.e hain
Leave a Reply