mahke hue gulon ka chaman bolne laga
vo chup hua to us ka badan bolne laga
anchal hai kahkashan to vo ḳhud bhi hai chand sa
bahon men meri aa ke gagan bolne laga
tabaniyon men us ki hai mauj-e-vafa ki guunj
din chup hua to dil ka ratan bolne laga
boli ga.i thi dard ke mausam men jo kabhi
phir vo zaban apna vatan bolne laga
ḳhamosh rah ke us ne guzari thi zindagi
vo shaḳhs jab mara to kafan bolne laga
dil ki haveliyon ke hue aa.ine ḳhamosh
shahr-e-ana men sang-e-kuhan bolne laga
aahan ke shor-o-shar men hai ‘asrar’ vo asar
lahje men dhun ke aaj ka fan bolne laga
Leave a Reply