Poet
ye kis ko jaag jaag ke taron ki chhanv men
ham mangte hain pichhle pahar ki duaon men
kirnen abhi to gum hain ghaneri ghaTaon men
bah ja.engi ghaTa.en ki kirnen havaon men
jannat ko duur duur to DhunDa gaya magar
qadmon tale na maan ke na teghon ki chhanv men
ḳhushki ke rahbaron se to ye bhi na ho saka
kuchh to ḳhuda ka naam chala na-ḳhudaon men
ya-rab qafas hai ya ki chaman kya hai ye jahan
uljhe paḌe hain phuul kaTili laTaon men
divana mast-hal hai us ko ḳhabar kahan
jhanjhan paḌi hui hai ki zanjir paanv men
donon ko apne des ki miTTi pe naaz hai
sanpon ki banbiyan bhi hain phulon ke gaanv men
sab chal paḌen jo ḳhuld ko jaati ho koi raah
gul-mohr ki do-ruya qataron ki chhanv men
ham shaiḳh se ye kah ke su-e-dair chal diye
rakhiyega yaad ham ko bhi apni duaon men
Leave a Reply