ye kis hasin ne logon ko rok rakkha hai
tamam shahr ke raston ko rok rakkha hai
nikal paḌen na kahin paane apni ta.abiren
isi liye sabhi ḳhvabon ko rok rakkha hai
vo kah rahe hain kaho dil ki baat baat magar
na jaane kyuun ka.i baton ko rok rakkha hai
dalilen dene ko de sakte hain hazar magar
sabhi havalon javazon ko rok rakkha hai
abhi hayat ke goshe chhupe hue hain bahut
kisi ne kyuun sabhi rangon ko rok rakkha hai
na apne-ap men ho jaa.e gharq dariya bhi
zamin ne kaise kinaron ko rok rakkha hai
na raaz faash kabhi hon zamin valon ke
falak ne chand sitaron ko rok rakkha hai
tamam log hi pagal na ho ke rah jaa.en
numa.ishon se hasinon ko rok rakkha hai
tamam shahr ko raushan na hone denge kabhi
hamare sinon ki aagon ko rok rakkha hai
diye bujhati bhi hain to jalati bhi hain yahi
ye kis ne tund havaon ko rok rakkha hai
na kaam karne ke karte na karne dete hain
hamare ḳhvason ne aamon ko rok rakkha hai
hamari rahnuma.i ko raste kaafi the
pa zulmaton ne bhi raston ko rok rakkha hai
kisi kisi ko hai haq zinda rahne ka hasil
dukhon ne logon ki sanson ko rok rakkha hai
bhale zamane ki ummid par abhi ‘ruhi’
bahut zaruri bhi kamon ko rok rakkha hai
Leave a Reply