Sher Afzal Jafri
jalva be-maya sa tha chashm-o-nazar se pahle
ziist ik hadsa thi qalb-o-jigar se pahle
husn ke soz-e-numa.ish ka hai in.am-e-hayat
vaqt bhi vaqt na tha shams-o-qamar se pahle
vahi utri dil-e-betab ki tashkil ke ba.ad
ishq ta.amir hua ilm-o-hunar se pahle
ain firdaus men jal uTTha tha aadam ka shabab
aag barsi thi yahin dida-e-tar se pahle
phir kahin dil ke siva un ko amaan hi na mili
but nikale ga.e allah ke ghar se pahle
zindagi mazra.a-e-taklif-o-sukun hai ‘afzal’
shaam ugti hai yahan nur-e-sahar se pahle
Leave a Reply