Ye Khwab Jis Ne Dikhae The Ek Safar Ke Mujhe

ye khvab jis ne dikhae the ik safar ke mujhe

vo ashk de gaya ankhon men umr bhar ke mujhe

hai fan men yakta vo sayyad ho ki ho dilbar

udaan bharne ko kahta hai par katar ke mujhe

kathin tha rasta dushvar thi har ik manzil

koi dikhae usi raah se guzar ke mujhe

main us ki khaas nazar se tadap tadap utthun

vo itne pyaar se dekhe thahar thahar ke mujhe

zara si der thaharne de ai gham-e-duniya

zara sa dekh le vo bhi to aankh bhar ke mujhe

mire khayal ki uljhan kahan sudharti hai

gul-e-bahar ne dekha hai phir sanvar ke mujhe

sulag rahi huun main sanson ki tez bhatti men

pila raha hai vo ulfat ke jaam bhar ke mujhe

vo shahd ghol raha hai samaaton men miri

bula raha hai koi baam se utar ke mujhe

dhadak raha hai mohabbat men dil mira ‘afroz’

guzar rahi hain havaen bhi pyaar kar ke mujhe

Leave a Comment