ye ḳhalq saari hava mere naam kar degi
mire charaghon ka jiina haram kar degi
suna hai dhuup ko ghar lauTne ki jaldi hai
vo aaj vaqt se pahle hi shaam kar degi
kuchh aur der jo Thahra main us ki ankhon men
to chand taron ko mera ghulam kar degi
main apne daur se bad-zan huun ibtida to karun
ki agli nasl mira baaqi kaam kar degi
phir is ke ba.ad vo mujh se lipaT ke ro.egi
safar ka Thiik se sab intizam kar degi
ḳharidne se to behtar hai us ko maang hi luun
vagarna unche bahut apne daam kar degi
batao is men bhi us ka koi ḳhasara hai
vo shahr-e-ḳhvab abhi mere naam kar degi
Leave a Reply