ye kaise malbe ke niche daba diya gaya huun
mujhe badan se nikalo main tang aa gaya huun
kise dimagh hai be-faiz sohbaton ka miyan
ḳhabar uḌa do ki main shahr se chala gaya huun
ma.al-e-ishq-e-ana-gir hai ye muḳhtasaran
main vo darinda huun jo ḳhud ko hi chaba gaya huun
koi ghaḌi hai ki hota huun astin men dafn
main dil se bahta hua aankh tak to aa gaya huun
mira tha markazi kirdar is kahani men
baḌe saliqe se be-majra kiya gaya huun
vo mujh ko dekh raha hai ajab tahayyur se
na-jane jhonk men kya kuchh use bata gaya huun
mujhe bhula na sakegi ye rahguzar-e-junun
qadam jama na saka rang to jama gaya huun
sab ehtimam se pahunche hain us ki bazm men aaj
main apne haal men sarmast o mubtala gaya huun
mire kahe se mire gird-o-pesh kuchh bhi nahin
so jo dikhaya gaya hai vo dekhta gaya huun
use bataya nahin hijr men jo haal hua
jo baat sab se zaruri thi vo chhupa gaya huun
ghazal men khinch ke rakh di hai apni jaan irfan
har ek sher men dil ka lahu baha gaya huun
Leave a Reply