libas gard ka aur jism nuur ka nikla
tamam vahm hi apne shu.ur ka nikla
jo apne aap se baḌh kar hamara apna tha
use qarib se dekha to duur ka nikla
badan ke paar utarte hi khul ga.iin ankhen
suragh tere sarapa se tuur ka nikla
sabhi nishaniyan us shaḳhs par khari utrin
jo bhuul kar bhi kabhi zikr huur ka nikla
uThe jo haath miri sangsariyon ke liye
har ek dast-e-inayat huzur ka nikla
na-jane bhuul gaya kaun kab kahan likh kar
miTa sa naqsh main bainassutur ka nikla
jo daana daana fana fasl-e-arzu ka hua
tamam fitna malaḳh aur mor ka nikla
giraft-e-fan se na azad ho saka ‘shadab’
ḳhayal-e-taza karishma bahur ka nikla
Leave a Reply