ye jo ḳhvabon ka chaska lag raha hai
faqat nindon ka dhoka lag raha hai
dua jiine ki sab dene lage hain
mujhe marne ka ḳhatra lag raha hai
tumhara hi karam hai mire dard
jo mera sher puḳhta lag raha hai
mujhe jab se laga hai nashsha-e-gham
mujhe har nashsha halka lag raha hai
magar ye main nahin huun aa.ine men
ye koi hai jo mujh sa lag raha hai
miri kashti men koi chhed kar do
mujhe dariya nihattha lag raha hai
kahan pe phans gaya huun main bhi aa kar
ye jism ik band kamra lag raha hai
Leave a Reply