ye junun ke ma.arke itne nahin asan bhi
soch lena is men ja sakti hai teri jaan bhi
raushni bhi chahiye taaza hava ke saath saath
khiḌkiyan rakhta huun apne ghar men roshan-dan bhi
zindagi men jo tumhen ḳhud se ziyada the aziiz
un se milne kya kabhi jaate ho qabristan bhi
gaanv ki pagDanDiyan pakki saḌak se ja milin
tang galiyon men badal kar rah ga.e maidan bhi
pasban-e-aql ne to mujh ko samjhaya bahut
tha magar pahlu men mere dil sa ik nadan bhi
ḳhushk hain dariya samundar kaT ga.e jangal tamam
ret se ḳhali hue jaate hain registan bhi
mere lafzon ke ujale maand paḌte ja.enge
dhund men kho ja.egi ik din miri pahchan bhi
ḳhud ko kaise qatl hone se bachata men ‘talab’
raat mere ghar men ik qatil tha aur mehman bhi
Leave a Reply