ye jis ne jaan di hai naan dega
diya hai jis ne sar saman dega
mizha se us kaman-abru ki bachna
vo navak hai kaleja chhan dega
mashaqqat se vo de ya be-mashaqqat
ba-har-surat ba-har-unvan dega
vo bosa de ke dil le kar ye bole
evaz ehsan ka kya insan dega
milega qadr-dan-e-ishq ham ko
khuda maashuq baiman dega
sunenge tab butan-e-hind apni
ijazat jab unhen shaitan dega
fasana kohkan ka sun ke bole
jo ashiq hoga vo hi jaan dega
na thi ummid tujh se qasim bakht
dil-e-pur-dard o pur-arman dega
rah-e-ulfat ka huun kar-azmuda
kisi ko dil koi anjan dega
chalega tiir jab apni dua ka
kaleje dushmanon ke chhan dega
muqaddar se zyada ek luqma
gada kya lega kya sultan dega
lipat jaunga un se roz-e-vaslat
agar mujh ko khuda ausan dega
na phaila ‘muntahi’ dast-e-havas ko
vagarna ye tujhe nuqsan dega
Leave a Reply