Nafas Ambalvi
jo dasht men mila tha mujhe itna yaad hai
mera hi naqsh-e-pa tha mujhe itna yaad hai
phir kya hua kabhi miri barbadiyon se puchh
teri taraf chala tha mujhe itna yaad hai
itna lahu lahu to nahin tha badan mira
haan zaḳhm ik hara tha mujhe itna yaad hai
vo bhiiḌ men khaḌa hai jo patthar liye hue
kal tak mira ḳhuda tha mujhe itna yaad hai
main jaise muddaton se isi rahguzar men huun
pal bhar ka fasla tha mujhe itna yaad hai
chehra kisi ka ab bhi tasavvur men hai ‘nafas’
ik ajnabi mila tha mujhe itna yaad hai
Leave a Reply