mushkil men raha vo bhi ki tadbir na tha main
main ḳhvab to tha us ka pe ta.abir na tha main
yuun bhi hua us ne mujhe sajdon se navaza
bad-baḳhti se jis shaḳhs ki taqdir na tha main
vo chhoḌ gaya raah men ye us ki raza thi
vaise bhi kisi paanv men zanjir na tha main
is zauq-e-suḳhan ne kiya rusva-e-zamana
pahle to tire raaz ki tash.hir na tha main
karta bhi to kaise miri pahchan zamana
dukh aisa tha ḳhud apni bhi tasvir na tha main
Leave a Reply