ye jahan bargah-e-ritl-giran hai saaqi
ik jahannam mire siine men tapan hai saaqi
jis ne barbad kiya mail-e-fariyad kiya
vo mohabbat abhi is dil men javan hai saaqi
ek din aadam o havva bhi kiye the paida
vo ukhuvvat tiri mahfil men kahan hai saaqi
har chaman daman-e-gul-rang hai khun-e-dil se
har taraf shevan-o-fariyad-o-fughan hai saaqi
maah o anjum mire ashkon se guhar-tab hue
kahkashan nuur ki ek ju-e-ravan hai saaqi
husn hi husn hai jis samt bhi uthti hai nazar
kitna pur-kaif ye manzar ye saman hai saaqi
zamzama saaz ka paael ki chhanake ki tarah
behtar-az-shorish-e-naqus-o-azan hai saaqi
mere har lafz men betab mira shor-e-darun
meri har saans mohabbat ka dhuan hai saaqi
Leave a Reply